بە کوشتدانی فەلەستینییەکان لەنێوان حەماسی حەماس و دنەی ئێرانییەکان
نووسین و ئامادەکردن: هۆرڤان رەفعەت
ئەمڕۆ 107 رۆژی تەواو بەسەر هێرشەکەی 7ی ئۆکتۆبەری ساڵی رابردووی هێزە چەکدارەکانی حەماس لەکەرتی غەززەی فەلەستین بۆسەر باکوور و رۆژئاوای ئیسرائیل (کە خاکی داگیرکراوی فەلەستینییەکانە) تێدەپەڕێت!
لەم شەڕەدا کێ براوەیە و کێ دۆڕاوە؟
لە راستیدا (فەلەستینییەکان و ئیسرائیلییەکان وەکو خەڵکی سڤیل دۆڕاوی یەکەمن) بەڵام (ئیسرائیل و دەزگای هەواڵگری مۆساد + هاوبەشەکانیان) لەگەڵ دەزگای هەواڵگری ئیتڵاعاتی ئێران براوەی یەکەم و دووەمن.
هێزە شەڕکەرە بەوەکالەتەکانی حەماس و هێزە بەکرێگیراوەکانی وەکو حوسسیەکانی یەمەن و میلیشیاکانی لوبنان و سوریا و عێراق و حزبوڵا پاشان سوپای پاسداران دۆڕاوی یەک لەدوای یەکی شەڕەکەن، چونکە زۆرترین زیانی دارایی و گیانیان هەبووە.
من کە لە سەرەتاوە پاڵپشتی هێرشە حەماسییەکەی حەماسم نەدەکرد بۆ سەر ئیسرائیل و دڵخۆشنەبووم پێی هۆکارەکەی ئەوەبو لێم دیاربو کە دوای 100 رۆژی جەنگ چ ئەنجامێکی خراپی دەبێت!!
تەماشای ئەم ئامارانە بکەن…
زیانی گیانی
تائەمڕۆ کە ڕۆژی 107ی جەنگە
تا ئێستا 24 هەزار و 448 هاوڵاتی مەدەنی بێ چەکی فەلەستینی کوژران.
نزیکەی 10 هەزار و 210 کەس لە کوژراوەکان منداڵن واتە هەر رۆژێک لە سەرەتای شەڕەوە 100 منداڵ کوژراون
نزیکەی 3 هەزار ژن و خانم لە فەلەستین کوژران
واتە لەسەدا 54ی کوژراوەکان ژن و منداڵن
هەزار و 100 منداڵ قاچێک یان هەردوو قاچیان لەدەستداوە بەپێی ئاماری رێکخراوی تەندروستی جیهانی WHO
بەڵام تا ئێستا تەنها 1410 ئیسرائیلی بە مەدەنی و سەربازەوە کوژراون کە نزیکەی 530 کەسیان سەرباز و پۆلیس بوون
33 منداڵی ئیسرائیلی کوژراون بەپێی ئاماری دەزگای OCHA ی ئیسرائیلی
زیاتر لە 60 هەزار هاواڵاتی مەدەنی فەلەستینی کوژراون
بە گوتەی میدیای نافەرمی فەلەستینی 3800 چەکداری حەماس کوژراون و میدیای ئیسرائیلش دەڵێت زیاتر لە 8 هەزار چەکداری حەماسمان کوشتووە (من خۆم باوەڕم بە ئاماری هەردووکیان نییە و ورد نیین ئامارەکانیان)
کوژرانی رۆژنامەنووسان
٨٣ رۆژنامەنووس کوژراون
٧٦ رۆژنامەنووسیان فەلەستینین
٤ رۆژنامەنوسیان ئیسرائیلین
٣ رۆژنامەنووسیان لوبنانین
٣١٥ کارمەندی تەندروستی و پزیشک
٥٥ کرێکاری بیانی کوژران کە زۆرینەیان نیپاڵین
زیانی گیانی ئاژەڵان لە فەلەستین
بەپێی گوتەی بەرپرسی باخچەی ئاژەڵانی رەفەح لە باشووری غەززە، بۆ رۆژنامەی زە ستانداردی بەریتانی : “زیاتر لە 2500 سەگ و پشیلە و ئاژەڵی دیکەی
ماڵی لە فەلەستین لە کاتی بۆردوومان لەناوچوون و ئێستاش بەهۆی کەمبوونەوەی خواردنەوە و ژمارەیەکی زۆری دیکەی ئاژەڵ لە برسێتیدا مرداربوونەتەوە، هەروەها لە سنووری رەفەح لە باشووری غەزە لەسەر سنووری فەلەستین و میسر ، هێزە ئەمنییەکانی دەروازەی سنووری رەفەح لە دیوی میسر رێگا نادەن، ئاژەڵەکان لەگەڵ خاوەنەکانیان دەربازی میسر بن و بردنە ژوورەوەی ئاژەڵی ماڵی و نا ماڵی بۆ میسر قەدەخەیە”.
زیانی ماددی
لەسەدا 50 بۆ 55ی شاری غەززە خاپوور بووە و جێگای ژیانی تێدا نەماوە و لەسەدا 45ی خاکی غەززە لەلایەن ئیسرائیلەوە داگیرکراوە ، زیاتر لە ملیۆنێک و 900 هەزار واتە لەسەدا 85ی هاوڵاتی فەلەستینی ئاوارەبوون .
تەماشا بکەن
غەزە دەکرێت بە 5 بەشەوە، کۆی گشتی دانیشتوانەکەی بە نزیکەیی 2 ملیۆن و 100 هەزار کەسە کە (لەسەدا 95ی مسوڵمانی سوننە و شیعە) و لەسەدا 5یشی کریستیان و جوون.
بەشی باکوری غەزە
شوێنی ژیانی 430 هەزار کەس بو
ئێستا لەسەدا 68 بۆ 81ی باڵەخانەکانی رووخاون و کەڵکی ژیانیان نەماوە
بەشی ناوەندی سەرووی (شاری غەززە)
شوێنی ژیانی 731 هەزار کەس بو
ئێستا لەسەدا 71 بۆ 83ی باڵەخانەکانی رووخاون و کەڵکی ژیانیان نەماوە
بەشی ناوەندی خواروو (دێر بەلح)
شوێنی ژیانی 310 هەزار کەس بو
ئێستا لەسەدا 30 بۆ 39ی باڵەخانەکانی رووخاون و کەڵکی ژیانیان نەماوە
بەشی باشوور (خان یونس)
شوێنی ژیانی 426 هەزار کەس بو
ئێستا لەسەدا 38 بۆ 49ی باڵەخانەکانی رووخاون و کەڵکی ژیانیان نەماوە
بەشی باشووری تەواو (رەفەح)
شوێنی ژیانی 267 هەزار کەس بو
ئێستا لەسەدا 18 بۆ 27ی باڵەخانەکانی رووخاون و کەڵکی ژیانیان نەماوە
واتە بەکۆی گشتی بە نزیکەیی لەسەدا 55ی غەززە تەواو وێران بووە و کەڵکی ژیانی نەماوە و 1 ملیۆن و 500 هەزار کە لە دانیشتوانەکەی ئاوارەبوون.
94 نەخۆشخانەی فەلەستین رووخاون بەهۆی بۆردوومانەوە بەپپێی ئاماری WHO
37” قوتابخانەی فەلەستین رووخاون بەهۆی بۆردوومانەوە بەپێی ئاماری UNICEF
ئاماری کوژراوە بیانی و فەلەستینییەکان
لوبنان
بەگوتەی میدیا فەرمی حیزبوڵا تا ئێستا 146 چەکدار و فەرماندە و خەڵکی کە بە رەچەڵەک لوبنانین لە خاکی لوبنان و فەلەستین کوژران و کە خەڵکی شارەکانی (نەبەتیە - هەرمل - بەعلەبەک - بیقاع - بەیروت - پارێزگاکانی باکور)
سوریا
بەگوتەی میدیا فەرمی سوپای پاسدارانی ئێران، تا ئێستا 23 سەرباز و راوێژکاری سەربازی و فەرماندەی سەر بە سوپای پاسداران کە نزیکایەتییان هەبوە لەگەڵ حکوومەتی سوریا و حزبوڵای لوبنانی لە دیمەشق و پارێزگاکانی باشوری سوریای نزیک لوبنان کوژران
یەمەن
بەگوتەی میدیای حوسییەکانی یەمەن، تا ئێستا نزیکەی 10 چەکداری حوسییەکان لە هێرشەکانی ئەمریکا و بەریتانیا بۆ سەر پێگەکانیان کوژراون، هاوکات میدیا ئەمریکا دەڵێت ٦٠ پێگەیان خاپوور کراوە و ژمارەیەکی زۆر چەکداریان کوژراون.
فەلەستین
بەگوتەی میدیای ئیسرائیلی، تا ئێستا نزیکەی 8 هەزار چەکدار و فەرماندەی هێزەکانی حەماسیان کە غەزە کوشتووە، بەڵام ئەم ئامارە لەلایەن هیچ دەزگایەکی سەر بە بزووتنەوەی حەماسەوە پشتراستنەکراوەتەوە!
ئیسرائیل
بە گوتەی میدیا نافەرمی فەلەستینی 3800 چەکداری حەماس کوژراون و میدیای ئیسرائیلش دەڵێت زیاتر لە 8 هەزار چەکداری حەماسمان کوشتووە ، هەروەها میدیا ئیسرائیل دەڵێت 530 سەرباز و فەرماندە و پۆلیسمان کوژراوە.
بەکۆی گشتی
خاکی غەززە لەسەدا 55ی باڵەخانەکان کاولبووە و لە سەدا 85ی خەڵکەکەی ئاوارە بووە
هاوکات سەدا 45ی خاکەکەشی ئێستا لەژێر پێی ئیسرائیلییەکاندایە و داگیرکراوە
حەماس دەڵێت “ئێمە ژێرزەویمان لە سوپای زایۆنی کردووە بە جەهەننم”، خۆ ئەگەر ئەو قسەیەی حەماس راستیش بێت، هاوکات قسەکەی ئیسرائیلیش راستە کە دەڵێت “ئاسمان و سەر زەویمان بۆ حەماس کردووە بە جەهەننەم”.
من دەزانم ئەمانە تاوانی جەنگن و ئیسرائیل و مۆساد و پشتیوانەکانیان لێی بەرپرسیارن!
بەڵام کێ ئەوەندە گەمژەیە بۆ چالاکییەکی فیدایی هێرشکاری و سەرکەوتنێکی چوار پێنج کاتژمێری و کوشتنی 100 بۆ 200 سەربازێکی دوژمن ئەو هەموو قوربانییە بە خەڵک و خاکی خۆی دەدات؟
ئەمەی حەماس کردی نەخوێدنەوەی باڵانس و هێز بو نەک سیاسەت
ئەمە خۆ بەکوشتدانە نەک شەڕ بۆ خاک و خەڵک و خوا
ئەمە جێبەجێکردنی پلانێکی حەماسی بو !
ئێوە پێتان وایە دەزگای مۆساد هیچ ئاگاداری هێرشی 7ی ئۆکتۆبەر نەبووە؟
ئێوە پێتان وایە 1000 چەکداری حەماس و نزیکەی 100 بەرپرسی سیاسی و مەدەنی و لۆجیستی حکوومەتی غەززە و حەماس کە سەرپەرشتی داڕشتنی پلانی هێرشەکەیان کردووە تاکە کەسێکی تێدا نەبوە کو پلانەکەی دزە پێکردبێت بۆ ناو خێزان و هاوڕێ و دەزگا هەواڵگرییە پەیوەستەکان و دۆستە پشتیوان و هاریکارییەکانیان؟
وەڵامەکەی بۆ خۆتان جێدەهێڵم!
بەڵام ئەم هێرشە، باشترین دەرفەت و باشترین هەڵەی چاوەڕوانکراو و باشترین هەڵەی دڵخوازی مۆساد بووە تا ئەو هێرشەی چەنێکە دەیانویست بیکەنە سەر غەزە و پاڵپشتییەکانیان لە لوبنان و سوریا و عێراق ئەنجامی بدەن و ئامانجەکانیان بپێکن.
هەروەها باشترین دەرفەتیش بوو بۆ ئێران تاوەکو هیلالە شیعییەکی خۆی و هێڵە بەرگیریکارییە ئیسلامییە وەلائییەکی فراوانتر و بەهێزتر و پڕچەکتر بکات و زیاتریش هێرشەکانی خۆی بۆ سەر نەیار و رێگرەکانی لە هەرێمی کوردستان و عێراق و سوریا و لوبنان رەوایەتی پێبدات و رۆژهەڵاتی ناوەڕاستیش بۆ جەمسەرگیرییە ئیسلامیبونەکەی پڕ کێشەتر بکات بۆ دوورخستنەوەی کێشەکان لەخۆی.
بەڕێزان تەماشای ئەم زیانە زۆرانە و تەماشای ئەم پشت پەردانەشتان کرد!
ئایا لە شەڕی وەکالەتی حەماس بۆ ئێران و شەڕی دەرفەت ئاسای ئیسرائیل کێ سوودمەند بو کێ زیانی کرد!!!؟
تێبینی: ئامارەکان کۆکراوەی 107رۆژی جەنگن لە زیاتر 30 سەرچاوەی باوەڕپێکراوی وەشانکاری هەواڵگری و سیاسی ئینگلیزی و عەرەبی، هەر ژمارەیەک لە زیاتر لە 5 دەزگای باوەڕپێکراو چێکم کردووە.
