🖋️ عەبدوڵای مەلا خدر
لەهەر شوێنێکی دونیادا کەسێک بۆ هەرمەبەستێک قورئانێک بسوتێنێ ، ئێمە وەک ناڕەزایی کاردانەوەی توندمان هەیە و بەپێشێلکردنی پیرۆزیەکانی خۆمانی ئەزانین .
هەموومان دژی سوتاندنی قورئانین وەک خودی پەرتوکەکە ، بەڵام ڕۆژانە خۆمان بەئاشکرا ئایەتەکانی دەسوتێنین .
ئەرێ قبوڵکردنی ژیانێک بەم دۆخە خراپە کەخەڵک موحتاجی نان و ئاوێکە و ئێمەش چەپڵە بۆ دز و مافیا و پیاوکوژەکان لێئەدەین ، ئەوە سوتاندنی ئایەتەکانی قورئان نییە ؟
ئەرێ ترسی نان بڕین لەلایەن حیزب و حوکمەت و مەعمەلەکانەوە پێچەوانەی ئەو باوەڕە نییە ، کەئەڵێین تەنها خودا ڕازقە ، ئەوە سوتاندنی ئایەتەکانی قورئان نییە بەکردار ؟
ئەرێ غەیبەتی خەڵک و دووڕویی و بوختان کردن بەخەڵکی کەقورئان بەتێکستی ڕاستەوخۆ حەرامی کردووە ، ئەوە سوتاندنی ئایەتەکانی قورئان نیین بەکردارەکانمان ؟؟
دەیان شتی تریش کەئێستا دڵنیام دێ بەمێشکی ئێوەشدا ، بۆیە ناینوسم تائێوەش بیرلەسوتاندنی ئەو ئایەتانە بکەنەوە کەخۆتان و چواردەورتان ڕۆژانە دەیکەن.
لەکۆتایدا دەڵێم ئێمە گەر دووژمنەکانمان مزگەوتەکانمان تۆپ باران بکەن و دەیان قورئان تێیدا بسوتێ کێشەمان نییە و لەڕابردووشدا عەرەب و فارس و تورک کردوویانە و نقەمان لێوە نەهاتووە ، بەس کابرایەکی ڕووت و ڕەجاڵ لەوبەری دنیاوە بۆ ئیقامە بیسوتێنێ ئێمە لێرەوە ئەکەوینە چاو سورکردنەوە لێی .
ئەرێ بەو تۆپ بارانەیا بیرمکەوتەوە ، کوشتنی سەدان مرۆڤی کوردی موسوڵمانی مەدەنی بەتۆپ بارانی دووژمنان لەسوتاندنی قورئان گەورەتر نییە ؟؟؟
ئەرێ قورئان پیرۆزترە یان خودی مرۆڤ ؟؟
قورئان بۆ مرۆڤەکان هاتووە ، نەک مرۆڤەکان بۆ قورئان بەدیهێنرابێتن.
ئەم وتارە دەربڕی ڕای نووسەر خۆیەتی
